Susa-ko liburuak

ITURENGO AROTZA

Hainbesteraino alienatu gaituzte non guk geuk zapaltzen dugun euskara, euskaldunok, txaloaren laido bila.

Arturo Kanpion ari da sarrerako hitzaldia ematen Irungo Euskal Jaietan. Adibidea, emakume aberats batek fundazioa sortu zuen, diruz polito hornitua, Iturenen eskolak eraikitzeko eta maisu-maestrei soldata emateko. Irakasle hautagaietan, euskaldunek ukanen dute lehentasuna. Halako batez hutsik geratu da maisuaren plaza. Iruñako Udalak, bera izaki Iturengo maisu-maistrak izendatzeko ahalmena daukana, ordezko erdalduna bidali du, gaztelarra hain zuzen.

Engracio de Aranzadi jaunak —artikulu guztiak erdaraz egin zituen goiz tenoreko abertzalea Gipuzkoan— protesta bizia egin du prentsan. Nik beste horrenbeste, eta zer gertatu zen orduan?, galdetzen die entzuleei hizlariak. Iturendik bertatik erantzun, prentsan noski.

Este Ayuntamiento, Junta local y padres de familia han recomendado siempre a los maestros que no permitan nunca que sus discípulos hablen el vascuence dentro ni fuera de la escuela, pues desengañados estamos que lo que necesitan los jóvenes es saber castellano, idioma universal de España y América, que es donde los hijos de este pueblo han de desenvolverse en el estudio de sus carreras y profesiones.

Horra aldeano dirukoien utilitarismoa, horra Iturengo semeak esportaziorako gaitzat hartuta, horra gizakia merkaturako egokitu beharra... deabruak hartuta Kanpion jauna.

Zer indarrek manipulatzen dute Ituren, Busturia, Beasain, Garazi...?

Nork idazten ditu halako ohar bikainak prentsarako?

Iturengo arotza mailuka, beti mailuka, alkatea urtuta joareak egiten.

Euskalduna da oraino.

Arturo Campion. Discurso en las Fiestas Euskaras de Irun. 1903

Arturo Campion. Discursos políticos y literarios. La Gran Enciclopedia Vasca, 1976