IBAIEN ARTEAN
Frantziari Hexagonoa esan izan zaio, forma hori dauka, forma geometriko bat, bizitza era arrazionalean antolatzen diguna. Le Corbusier.
Espainiak zezen-larruaren itxura omen dauka. Larruarena, hila izan behar baitu, zezenketaren batean menturaz, eta horregatik burubakoa. Aldi berean zezen eta zezen-hiltzailea dugu Espainia, la pell de brau. Furia eta artea batzen ditu bere idurian. Pablo Picasso.
Mendebaldean
Missouri eta Bravo del Norte artean
Ameriketako Estatu Batuak ditugu.
Ekialdean
Beltza eta Sungari ibaien artean
Txina dugu.
Iparraldean
Rhin eta Elba ibaien artean
Alemania dugu
Hegoaldean
Orange eta Olifants ibaien artean
Hegoafrika dugu.
Hemen
Ebro eta Aturri ibaien artean
bihotza dugu.
Euskal Herriaren mapak bihotzaren itxura dauka. Ez zientzia ez furia da gurea. Sentimendu bat, besterik ez.
Euskara ez da ezein ibairen artean kokatzen ahal.
Zeren antza ote dauka bere soslaiak?
Ignazio Aiestaran. Sentimenduen Iparrorratza. Elkar, 2003
© cc-by-sa Koldo Izagirre