GIZAKIA IZAN NAHIRIK
nik ere munduko beste bazterren batean
nahiko nuke bizi
denek ulertzeko eran mintzatu
ezentzunarena egin gauzen itauntze errime horri
gauzen tematze deserosoari ez ikusia egin
hiri jendetsuetan ibili bestelako jendea agurtu
akaso munduko beste hainbat lekutan
ariketa errazagoa izango da
aberriaz ahazteko hori
baina hemen beti ari zaizkizu gogora ekartzen
zapaltzen duzun lurra ez dela zurea
bizi zaren herria eta auzoa
norbaitek aldi baterako utziak dizkizula
eta gutxien uste duzunean etxerik gabe utz zaitzakete
bat-batean ez kalerik ez herririk
ez ordurik gabe gera zintezke
eta zeure hitzen erresuma gozo hartan
hartzen duzu aterpe
maite dituzunez oroitu eta joko duzu aurrera
baina apal mintzatu arren
ez dago aberriaz erabat ahazteko modurik horrela
Jose Luis Otamendi. «Aberriaz zelan ahaztu». Erlojuen mekanika. Susa, 2007
© cc-by-sa Koldo Izagirre