IV
Lo egizu egizu lo
deskantsuan bihar artio
nik zu zaitut maiteago
gau beltzean loa baino
eremu debekatuen lurreko haurra lo egizu egizu lo
bihar oraino iparretik hegorainoko dantza amoltsuan
gaztelu-gaineko ikurrina balantzatuko baita
hormatze krudelen lotsarik gabe
hitza ebasten ez diguteno biziko baikara
eta biziko zeru-itsasoen ortzaizeak miresteko
libertaterik handiena dastatuz
ez ikara haurra egizu lo lo egizu
mendeen barbariak ez gaitu biluziko
hitzaren distiraz edertuko zaizkigu ezpainak
ordea
eta
aditz trinkoaz kateak hautsiko ditugu
loaren ondoko biharamun urosetan.
ordea
eta
izar xuriz mila dago
iparretik hegoraino
nik zu zaitut
maiteago
ilargiak gaua baino
© Itxaro Borda