Herio mehatxua
ondare bihika gorraila
bihurtzen den goizetan,
hegoak,
haize eroak
gorputzak urez hustu arau
larru idorreko arroila pairatuetan
ondarekin zorrotzak
eztiki pausatzen ditu
urrakoak josi beharrez.
itsas ametsez hantzen gara
herio mehatxuaren
ondare bihika gorrailak
amodio bihurtzen diren goizetan.
eki-dantza tematsuen
eskaintzeko zilegitzen diguten
alor hertsiaren saparren maldan
metatzen dira gero
ihardok-lehiaren bihozki bakartiak.
mineral errautsak
senda gaitzala! suntsipen iragarritik
urruntzeko kemena eman diezagula!
eta iraun-bidea erakuts
jadanik debekatuak zaizkigun
dolamenaren eremuetan barna!
© Itxaro Borda