Begira hor daukak muga
utz itzak hemen sandaliak
atzerrian hotza baino ez duk kausituko
gorde hogei pound badaezpada ere
soldadu batzuek deskontuak ere egiten ditiztek
baina ez egiek inola begietara so egin
han bala bat bezain merke ordaintzen dituk begiradak.
Posible bazaik bidal iezadak postal klandestinoren bat
lur apatridetako gezurrak azter ditzagun:
justizia legeztatu dutela kantitate ttikietan
eta txakurrek giza lorategietatik abesten diotela iretargiari
konta iezaguk non dagoen azken trenbide arrastoa
sinfoniak herdoildu direnentz eta
herdoilaren sinfoniak al dauden musika kaxetan.
Etsaien auzuneetan giroa hobea ei duk
eta izuak ez dik traidore kamuflajerik janzten
zintzoa bahaiz jaten eman eta zein uniformerekin
fusilatu aukeratzen utziko ditek.
Hoa aduanatik bestaldera poltsa urdin horrekin.
Han ere ez duk hemen ez dagoenik egonen eta.
© Urtzi Urrutikoetxea