Mutiko gazteak
dastatzera ere iritsi ez den lehen
maitasun galduaren begiekin antzematen du mundua
eta galderak eta hausnarketak eta
erabakiak bilatzen ditu
«nik maite haunat, ordea»
atzera idatziko ez duen boligrafoa
orrian kolpatzen den antzera
azken tinta mantxak azaleratzeko.
Nahiko luke indartsua izan
porturik portu gizon zintzoen emazteekin larrua jo
eta pirata errebeldeen kanoiekin kale borrokara lotu.
Munduak bera ikustea nahiko luke
arrakastadun exekutibo zoriontsua bailitzan
ezkermuturrekogaztebiolentoinkonprenituenbertsioan,
baina iraultzari ere ez dio itxaropen izpirik sumatzen
bihotz erituen gorritasunetik landa.
Astiro eraikitzen ditugu hilobi untziak
zain ditugun lurralde birjinetara nabigatzeko.
© Urtzi Urrutikoetxea