Kandela indarge honek
ez ditu zure poemetako sakonuneak argiztatu gura,
edizio mugatuko hiruzpalau liburu,
ehungarren orrialdera ailegatu barik,
egunkari hasi berria, zuritasunaren inozentzia aldean,
paperezko mukizapiak pilatzen zaizkit mesanotxean,
eta argazki desenfokatu hauek,
patrolak, uniforme berdeak eta itxaropenaren
alanbradak zientoka,
bizkor idatzitako matrikularen bat
baina zure arrastorik arean ez.
Zabor biltzaileen kamioiak leihoaz bestaldetik.
Sexua eta agitazioa kantu beraren irakurketak dira,
maitasunaren eta iraultzaren idazlanak biltzen ditu.
Kuarteletako laborategiek aspaldi izan zuten gure berri
gure dantzak teknika berriekin desaktibaturik
euren abertzaletasun kotizazioaren
tertulia bihurtzen dituzte.
Begiak estalita itsu itsuan fusilatzen duen
iskiluaren justizia datorkigu
diesel usaina dakar errepresioak haztamuka,
ezpainak bilatzen dizkizudan eran
borrokaren kale kantoietan ikarati.
© Urtzi Urrutikoetxea