Gitarra flamenko baterako kantua moldatuko nizuke
ijitoen berbakeraren erotismoz bildurik,
txalo beroz definitu gorputz mugimenduak,
eta osatuko nizkizuke begirada jokoen erruleta errusiarrak
edo labirinto estuan isilpeko doinuak uztartuko genituzke
ele bakoitzean hunkitzen duen hizkuntza klandestinoan.
Bular artetik isurian doan izerdi ttanttoa
folklore itzaltsuen hurbiltasunaz xukatzen,
eskumuturrean pausatzen dizkidazu atzamarrak xera ezkutuz
eta inozentziaren olgeta bailitzan dardaraz
bular harrotuei
esku jostarien galdeketei erantzuna jasotzen diezu
lege zaharren aterpe ezezagunetan.
© Urtzi Urrutikoetxea