Banekien aspaldi okerturiko bidegurutze hartatik
bizitza kamuflatuak baino ez zeudela
kalean eta herriko tabernetan sortutako seinak,
atzerapausorik ez dagoela
lautada asagoetan aurkitu genituen
iraultzarako dekoratuak,
non eta gizakia infinituaren bertigoan galtzen baita.
Eta armaturik bailara intsumituren bat
gure mapetan gatibatuko zutelakoan,
aurrera bidean ibar ilehori hura
agertu zitzaidan ipar-orratza biluziz
imitaziozko artizarrak jarraitu nituen
uztaileko egun euritsuetan.
Beharbada jakin behar nukeen
Artxanda ez dela Hollywood Hills
eta Bilbok Los Angelesen mozorroa baleuka
Kafe Antzokian klub kirastuetako pertsonaiez
eta malenkonia hezez makilatu gintezkeela.
Hortaz, zelan ez dut oroitzen
zein praka zeramatzan eta ondo lotzen ote zitzaion
kamiseta estu hura?
© Urtzi Urrutikoetxea