Gainez egin beharrean irteten dira untziak
gure portuetatik,
bultzaka eta kontrabandoan eginiko tiketekin
igo da jendea,
baina gaurko ordulariek ez dute eresi askatzailerik joko.
Auzoko mutilak oparitu zion gona urdina
etxeko errautsen artean utzi du neskak,
dena abandonatu dugu atzean,
hondamendiaren erresumako egoile
lur zatiak ere bonbaz josten dira gurean,
goizaldean etxeratzerakoan daramagun
whisky botilaren antzera hustu dira zelaiak
eta aurtengo uztak nekez kenduko digu gosea.
Munizioa erein genuen eta heriotza baino ez dugu biltzen,
co. down co. kilkenny co. kerry co. sligo
lur berrietako albisteek betetzen digute sabela
eta joan direnentzako mezuak daramatzate coffin ship-ek
idatziko diegula esaten diegu,
beren esku gaudela eta gugan inbertitzeko erreguan.
Duintasunak deus gutxi balio baitu elikatzeko.
Untzi horietan doa gure etorkizuna.
Hemen gure iragana ehorzteko lurraz ere
desjabetu gaituzte.
© Urtzi Urrutikoetxea