Egunargia begiztatu eta zoragarri iritzi zenion
otsaileko goizeko eguzkia sortuz
zure zilarrezko zintzilikariaren distiran galdu
zitzaizkizun adats ausartak eta so urrina daukazu,
ortzemugaren dianan tinkaturik urtutako itsas begiak.
Gure lurraldean kateaz josi dituzte
bolizko samarik ederrenak,
beren aurpegi kaputxatuen geometriak
traje ilunak jarri dizkio
atorretan marrazturiko lentzeriari.
Mikrofonoetako galarazpen arautua
airean dagoen gorpu ustela da.
© Urtzi Urrutikoetxea