Antigoaleko hieroglifikoak deszifratzen ibili ginen
sekretu berriak eta galarazpen itsuak
harilkatzen genituela ohartzeke.
Zintzotasun konplizearen eta zentsura arrosen
labanaren ertzetik maitatu zaitut,
non eta hausnarketak
likore edabe pizgarrien eta arma ezkutuen
kontrabando untzietan bururatzen diren.
Iraultza konplizea xuxurlatzen zenidan
manu militari papiroz belarri ertzean,
mosu irristakorra eta hats epelenaren karriketatik
askatasunaren panfletoak itsasten zenituen.
Gero polizia iritsita iheslari arrunt bihurtu ginen
urrats galduen zelatari.
Eta bizitzaren koordenadak
disidentzien brujula batean izoztu zaizkigu.
© Urtzi Urrutikoetxea