Baldin errepide honek helmugarik balu,
harrizko mapa honek esanahiren bat
agur eutsi ekin berandu da the end
baleuka bere biluztasun zaporgean,
beste zerbait izkiriatuko nizuke seguruenik.
Izkiriatuko nizuke seguruenik
hau zure antzekoa dela,
hotza gogorra eta intimitatearen soineko
ederra jantzirik beti
edo hemen egotea
zure ausentzia bezain hitsa izan daitekeela.
Seguruenik horrelako gauzak izkiriatuko nizkizuke
eremu infinitu honen erdian
itsasoa non marratzen den baneki,
ez banintz zuribeltzezko
argazki koxkor honetako protagonista;
Stand by me irrati bertsio miserableenak ere
ahaztu du lurralde hau,erlojuak eta brujula sakrilegioak dira hemen
eta iparrerago joz haizearen
berba ttikiena xerkatzen dut
malenkonia eta irudi hautsiak soilik
garraiatzen dituela ohartzeke.
Desolamenduaren aberrian amorante apatridek
kontsolamendu berriak asmatzen ditugu
bihotz minberentzat, suizidiorako ere
koldarregiak diren hirugarren mailako poetentzat.
© Urtzi Urrutikoetxea