Travellers eufemismoa asmatu zuten
izate oso baten lotsaria
errespetuzko mozorroz ezkutatzeko,
usteldu ziren garaiak berpizten dituzte
gitarra proletarioekin,
suburbioetako teknologiaren azpigarapenak
berun azalez jantzi ditu antzinako kate uherrak
zaharrenek ere oroitzerik ez duten askatasun bila.
Heroinaren itsasoetan aingura altxatzea nekeza da,
merkatu ibiltarietan inork miresten ez dizkieten
bitxien ontasunaz sinestarazi gura lukete
joan ziren sasoietako amoranteen liburuak
urtu egin dira,
esku zarten paisaia tropikalean
garrasi sentituak prefabrikatzen diren urteetan
mesprezua da sentimendu bizien errepresioa.
Arrosaren arantzek galdu zaituztete
hosto gorrien perfumetan
eta bidean jarraitzen duzue
sekula seinalerik ezarriko ez den autopistan.
© Urtzi Urrutikoetxea