Haize bafadek lehertarazi dute zure erretratua;
whistlearen doinu puruak pertsianaren kontra
harrotzen dituzu eraztun dirdirakorren atzamarrez,
begira dagoz gau parkeetako homelessak
whisky usaina ere galdu duen whisky botilaren ispilutik
eta irri egiten diezu
zoriontasuna hedatzeko zizelaturiko
ezpain haragitsuekin.
Antidotoa izan nahian harrizko dosi ttiki bat
eskaintzen duzu goizaldean,
hotza eta bere gatibu hordiak baino
ez dira kausitzen ahal
sitsaren erresumako bankuetan.
Egunargiaren modura aurpegi alaiz darraizu
bestaldera so,
behiala irri egiten zenienei
mesprezuaren biloak emanez,
maitasun abandonatuen fitxategi polizialerako.
© Urtzi Urrutikoetxea