EZ GINEN HEROITARAKO JAIO
Gure eskuetako gasolina usainak
ez du inoren konprentsiorik erdietsiko,
labana puntaren zorrotza mila bider iltzatzen bazaigu ere,
gure tribuaren psikologiak azalduko du dena
bertsio ofizial sentitu batean.
Zorioneko erresuma honetan ez dago
heroientzako lekurik
hemen zelofanezko paperean sinatu dute bakea
zelofan beltza bakarrik aurkitu badute ere.
Mila zokogunetako lur honetan
beste mila azpiko solairu eraiki dituzte
deklarazio ofizialen formulario fotokopiatuek
ziega zuloetan arrapaladan doaz ihes indarrak
ezdeusari ate joka.
Heroiak iparrean daude. Eta hegoan. Eta sarajevon.
Baina hemen heroiak aspaldi desagertu ziren
hodi katodikoen labirintoan galdurik.
Munduan zehar barreiaturik daude heroiak
eta ez hemen.
Hemen gu eta besteak bakarrik daude.
Gerizaren eta gasolinaren umeak bakarrik gaude.
© Urtzi Urrutikoetxea