Gaur arrastian zoriontsu egin nauzu
eman zidaten abisua izarrek, argi beilegizko
telareetan josi zituzten alfabeto xingle haietan:
«astelehen arrastian zoriontsu eginen hau»
nekez erratzen baitira izarrak,
mintzatu gara gauza ttikiez,
zure arnasa pausatuaren epela
aho ertzean desegiten zitzaidalarik
behar adina sekula hazten ez den tximinia
su horren pareko
baina nire izerdi leiak aizto zorrotzenez zauritu nau
eskua kamisetako hauts arrastoak inarrosiz
begiztatu dizut, algara xume bat,
eta sorbaldan indiskretoki agertzen den sujetadore zinta
gero zoruan pausatu dituzu atzera kickersak
eta ohi bezala urrundu gara,
lantzean behin so iheskorra antzematen dizut
zure irletako itsasoan dzanga xabukatzeko,
orduan,
aurpegi serioz aurrera bueltatzen zara
baina ni zoriontsu egin nauzu
© Urtzi Urrutikoetxea