PERPETUA YOLDIK
g
Zerengatik egin haiz puta?
Zerk ekarri hau hire etxetik honen urruti
zabortegi honetara galdetu zidan behin
marinel euskaldun batek bi galderak
galdera bera bailiren
Eta nik ez nekiela zerengatik
Egun hartan nire gorputzeko
dorre arraildura neureganatu zenean
hiru galdera egin zizkidan
galdera bera bailiren
Zerengatik daukagu pagatu beharra?
Iragan uherrekoek zerengatik dute akabera tristea?
Zerengatik izekitzen dun pasioa ustekabean?
Eta nik ez nekiela zerengatik
Larrua jo ondoko tristuran galdetu zidan
galdera guztiak galdera bera bailiren
Noraino joanen haiz ihesi?
Zerengatik gaitun amodiorako elbarri?
Zerengatik dun gure hau bekatu?
Zerengatik daukagu pagatu beharra?
Eta nik ez nekiela zerengatik
ez nekiela
© Juanjo Olasagarre