PERPETUA YOLDIK
g
Amodio kontutan legerik ez dela
ongi asko ikasi badut ere
geurea ez zen naturala
Horrexegatik egin behar izan nuen ospa
hamazazpi betetzearekin
hemen aitortu ezin dudan bekatu batengatik
Ihesi, ze, behin esan zidaten bezala
binaka egin pekatuak
banaka ordaindu behar baitira
infernura jaitsiz salbazioa bilatuz.
Nire gorputzarekin pagatu nuen
Bilboko karriketan Marseillako portuan
pentsio zikinetan hotel dotoretan
Zahartzera karrikara atzera
Degradazioa aratz nahia baino ez da
Banekien zerura bidean nengoela
«Cuánto es, amor?» edo
«How much it is, baby?»
frantsesez edo
alemanez galdetzen zidatenean
Galbidean atzera ere
«Laztana, zenbat dun?» galdetu zidanean.
© Juanjo Olasagarre