GUTUN GALDUAK
Euliek zeldetako
ispilu tipiak zikintzen dituzte.
Egunak galtzen ditugu
oskorriak bere kolore arauak
galtzen dituen bezala.
Harresien bestaldean
etxe batzuk desdefinitzen dira.
Artean, balioen erlatibitateaz ez,
balioen fatalitateaz mintzo gara.
Haizeak bere delirioa arrastatzen du
mundua den eskuizkribu
irakurgaitzaren gainean.
Eta gure gutunak ez dira sekula iristen:
helbideko kaleraino ailegatzean
karteroa, taberna morera sartu,
mozkortu eta
gutun guziak galtzen ditu.
© Joseba Sarrionandia