JELOSIA
katua jandakoa ni baldin banaiz
zergatik zara zu
gure etxeko laztan-zale nagusia?
katua jandakoa ni baldin banaiz
zergatik zara zu
maukari lazgarriena
epelik ere ura maite ez duen
teilatuetako gaukaria?
katua jandakoa ni baldin banaiz
zergatik zara zu
esnea kendu ezin zaiona
harramazka politenen marrazlea
etxeko saguon soinularia?
katua jandakoa ni baldin banaiz
zergatik zara zu
egun argiko lotia
oinik busti gabeko arrainkaria
ene bihotzaren lapurra?
ni baldin banaiz katua jandakoa
zergatik zara zu
esker txarreko miñiñi bezalakoa?
© Koldo Izagirre