SAN JUAN EGUNA

Arratsean igo naiz

errautsak ikustera.

Ke pixka bat darie oraindik,

                           gaizki jositako zainak.

Pixkanaka gerturatu naiz,

bezperakoa gogoan:

bero jasanezina

eta inguruko etxe guztietako leihoak

gorri-gorri.

Guztiz erre gabeko paperetan

saiatu naiz bilatzen

desiraren bat-edo,

baina ezer

irakurtzera heldu aurretik

galdetu dit errauts-zainak

ea geratzen dena itzali nahian ari ote nintzen.

Etxean,

arbasoak bilatu ditut

elizaren erregistroan.

1690era arte iritsi naiz

eta saiatu naiz imajinatzen jende hori dena

suaren inguruan,

haien aurpegi gazte-zaharrak bero,

begi biziak gorri,

sugar-dantzarien artean igarri nahian

etorkizun bat.