GRAFITI BATEK DIO
“GURE BIZITZAK EGUNERO”

Ez dut epikan sinesten

eta

beraz

ez dut hizkuntzarik.

Ez dut sinesten

keinu absolutuetan,

ertzik gabeko

hitzetan.

Egun seinalatuetan,

manifetan,

neonaren argiz ikusten ditut

zuloak

diskurtsoan¹.

Ezingo dugu sekula

dena esan.

Hitza da

goizero bere burua

josi behar duen

animalia mantso bat.

1 M8 edo M1 izan daiteke eta / perladun belarritako apainak daramatzan / emakume zaharrak / aurpegi txarrez gurutzatzen du / udaletxe aurrean bildutako saldoa, / emakume arrazializatu bat atzetik duela, / haren erosketak eramaten. // Kale-saltzaileek / corteingleseko eskaparateen kontra eserita / begiratzen gaituzte pasatzen, / oihuka gu / isilik haiek.