ARRATSA SIERRA DE GUARAN

Zeru hau

harrapaezina da

orain                                    da

betazal astun bat

nagi ixten,

irisaren kolore-ñabardura guztiekin

bere baitan bilduta duela ninia:

iluntasun ziur bat

beste guztia definitzen.

Arruntak dira elkarrekin ematen ditugun egunak,

arruntegiak agian.

Errekak lasai datoz

gure oinpera.

Ez dugu susmatzen

jario huts eta sotil horretan

higadurarik edo

bortizkeriarik

baina

egunaren hondarrean diozu:

azkenean,

marruskadurak egin du

munduaren parterik handiena

eta

lokartzear gaudela,

entzun dezaket

ia

nola irensten dituen kareak

trabatutako enborrak

arroiletan.