SMALLDANCE II

Baineran sartuta

hilda edo jaio gabe banengo bezala

geldi

gorputzean daramat

munduaren zarata.

Ez nuke nahi gauza handiegiez ardura

neurtezina da grabitatea

uretan.

Begiak ixten baditut

dena dago nire barruan:

taupadaka-odola-irristan auto-

-ilarak-semaforoetan planeta-

-batek-beste-baten-aurka-talka hatz-

-txikiaren-falangeen-kraska hegazkin-

-bat-lur-hartzen isila-

-al-da-lurraren-orbita diafragma-

-zabaltzen-saihets-bakoitza lehertu-

-da-eskuetan-globoa zerbikalak-

-luzatzen-dantzariak aharrausi-

-egin-du-DJak milioika-

-pertsona-ari-dira-aldi-berean

zertan

Bainerako tapoiak ez du guztiz ondo ixten

eta oinarekin eutsi behar diot

beste guztiari bezala.

Askatu nahiko nuke

baina

askatzen badut

ihesi doa.

Eskerrak

ze nik ez dut egon nahi

hilda edo jaio gabe.

Bizilagunak barrezka paretaren bestaldean.

Ura ihesi doa.