ARTELATZAK PORTUGALEN

Sinesten dut zauria ere badela

azalak bere buruarekin berriz topo egiten duen tokia.

Ocean Vuong

Azal bakoitza da aldarri bat.

Aimar Perez Gali & Jaime Conde Salazar

Zuhaitz larrutuak

haragizkoak ia.

Gorri

odolezkoak dirudite:

haitz gogorren kontra

sasitza berdearen kontra

definitzen da baso honen zauria.

Badakit odolik ez dela

baina horren daude babesgabe.

Haien enborrak oihu bat dira

ia harrizkoa dute biluztasuna.

Eta gu hemen

zuhaitz horietako baten azpian

haren haragia

ulertu nahian.

Agerian dute

zenbat aldiz

larrutu dituzten

zenbat aldiz berreraiki behar izan duten

mundutik babesteko geruza bat

ez zitezen izan betirako gordin

mundua ez lekieken suerta

horren krudel.

Klima mediterraneo honetan

harri zaharrez inguratuta

baso bat haragi bizian.

Nahi nioke zuhaitz bakoitzari eman

azal berri bat orain.