I DON’T BELIEVE
IN AN INTERVENTIONIST GOD II
(MAR)

Martinentzat

Garbantzuak bazkaldu bitartean

diozu

sinesten duzula

hil ostean

itsasora itzultzean,

bertatik atera bagina bezala

behin,

anfibio lirdingatsu

edo urtar iheskor.

Diozu

gustatzen zaizula pentsatzea

badagoela sekula

ulertuko ez dugun zerbait bizitzaz

eta itsasoa badela nahikoa

zabal ulertzen ez duzun

horren hutsunea

betetzeko.

                      Behin, hamar matrioxkatan

                      gorde genituen gure amonaren

                      azken hondarrak

                      eta isuri genuen horrela-pixkanaka

                      itsasora

                      eta eskuak bustita

                      ezin izan genituen bereizi

                      errautsak eta harea.

Diozu

lasaitzen zaituela pentsatzeak

inoiz

zu ere

pixkanaka-horrela

itzuliko zarela

itsasora eta listo.