HAZKA

Denbora gorputzetan baino ez da gertatzen.

Imajinatzen ditut nire bularretan pilatu nahian

toki bila egunak.

Horrenbeste gauza daude hemen

lekua egin nahian ahur-saihets-oinetan

negarra harrotasuna desira ama eta aita anaia

umiltasuna lotsa amorrua

lagunak maitaleak hitzak.

Heriotza ere gorputzetan baino ez da gertatzen.

Ornoetan gordeta ditut

une konkretu horiek.

Bizkarrezurra horma-hobi

eta birikak katedral malgu

jainkorik txikienak

asmatu eta botatzen.

Galdu dudan guztia eskuek galdu dute

eta hala ere

segitzen dute

zabal-zabalik

hautsa bezala.