Susa-ko liburuak

ATEA JO DUTE

Neure esku dagoen guztia egin dut

bebarruak ondo zarratzeko,

baina ez dago aditua zertan izan

nire bakardadea eta zurea

sinonimoak direla ulertzeko.

Arriskutsuegia litzateke orain partitzea,

oso bustiak daude karrikak.

Utzidazu esku horiek berotzen,

titiburuak ahora ekartzen,

zure erbestea alderik alde zeharkatzen.

Txandaka egingo dugu hausnarra

loak erabat har ez gaitzan.

Nire bularraren jabetza emana nizuke

ikaztutako begiek zainduko ez bagintuzte.

Bakartasunaren gotorlekuetan bizi gara ezinbestez,

etxetik irten eta deserria da lehenbiziko kalea.

Estratan behera doa arimarik gabeko gabardinaduna,

eskularruokin etsi beharko dugu aurtengoa.