Kaiera

Juan Bañuelosi

Bertsoak jainkoek baino hobeto

idazten dituztela dioten horiek ez dituzte

Nioberen moduan zigortuko, hark jainkosek

baino hobeto ehuntzen zuen eta esatera

ausartu zen eta hil zizkioten

seme-alabak eta bihurtu zuten marmol. Ez. Gaur

poeta horiei emango dizkiete

bekak, postutxoak,

enbaxadore izendatuko dituzte eta

haien arnasa marmoleztatuko.

Gezurrez gogaiturik dago hitza

eta ontzat eman du erabakia. Nahikoa

du bere buruarekin,

bere buruari galdetzearekin zer den, nor den,

ez jakitearekin izatearen

eta izateko fikzioaren artean mintzo ote den, idazten

duen bitartean

ezer esanda ez dagoen kaier batean.