Euria

gaur euri asko ari du, asko,

eta mundua garbitzen ari direla lirudike.

auzoko gizonak euriari begiratzen dio

eta maitasun gutun bat idatzi asmo du /

gutun bat berarekin bizi den

eta jana egiten dion eta arropa garbitzen dion eta berarekin maitasuna egiten duen

eta bere itzalaren antza duen emakumeari /

auzokoak ez dio sekula maitasun hitzik esaten emakumeari /

leihotik sartzen da etxera eta ez atetik /

ate batetik toki askotara sartzea dago /

lanera, kuartelera, kartzelara,

munduko eraikin guztietara /

baina ez mundura /

ez emakume batengana / ezta arimara ere /

hots / hala esaten diogun kutxara edo itsasontzira edo eurira /

gaur adibidez / euri asko ari baitu /

eta kosta egiten zait maitasuna hitza idaztea /

gauza bat baita maitasuna eta beste bat maitasuna hitza /

eta arimak baino ez daki non elkartzen diren biak /

eta noiz / eta nola /

baina zer azaldu dezake arimak /

horregatik ditu ekaitzak ahoan auzokoak /

urpera doazen hitzak /

eguzkia badagoela ez dakiten hitzak maitatu zuen gau berean jaio eta hiltzen direlako /

eta hark inoiz idatziko ez dituen gutunak uzten dituzte pentsamenduan /

bi arrosaren artean dagoen isiltasunaren gisa /

edo nire gisa / hitzak idazten baititut itzultzeko

euriari begiratzen dion auzokoarengana /

eurira /

nire bihotz deserriratura /