EZ ORAIN, EZ INOIZ
Arin igaro da iragana
aurreratu ditu hegazkinak
Beotibarko zelaietako
uholdeen gauean
gerla bukatu berri
umeari begira gaude ea
lo dagoen
eta ez dago lo
ahoz gora dago
begiak zabal-zabalik
laino beilegien azpian.
Kontatu dizkizuedan gauzak
arrainaren eta haren arrautzen
ur-lasterren orrialdeotan
ez dira errekaren ametsak
baizik eta ezin ukan guztiak
zeinak, batzuetan, garden
itzultzen diren
hitzekin pentsamendura.
Atzean ezer ez daukan ezinegona
eta zauriari darion baltsamoa
laster elur maluten aldera egongo den
leihoa bezala
udan hasi zena
udazken eder honetan sartu da.
Zenbat kolore zenbat poema
batzuk beste batzuen ordez
lehenengoz jotzen duenean
azken hego-haizeak.
© Igor Estankona