MAITASUNAREN OSTEAN MIRAILA
Maitasunaren ostean miraila
azazkal luzeak
Bostongo abokatuarenak
Bangkokeko prostitutarenak
maitasunaren ostean usaina
oxigeno bako airean.
Niri berdin zait orain badator
guztiontzako azken goiza
edo hau izatea hain zuzen
zerbaiten hasierako poza.
Hemen gera ninteke eta sinetsi
iluntasun hau
non entzuten dudan arnasestua
non suma dezakedan lurruntzen
bere gorputzeko ura.
Orain dela asko
neure buruari esango nion
segi, ahalegindu berriro.
Eta arinago oraindik
hil egingo nintzen onartu baino lehen
Lisboako harresiak.
Baina orain hausnartu eta diot
uztazu, uztazu,
une batez behintzat eduki duzu
zuku leuna.
© Igor Estankona