MADEMOISELLE
Hondartzetako gorputz gazteen azala
bizkar bat ferekatzean
udaberri hasierako moxalen ile horia
adats bat usaintzean
badakit lurralde ezezagunak daudela
ametsak baino harago ur moreak daudela
azkenean orriak jausi eta usteldu egiten direla, badakit
baina bizitza osoa baino luzaroago bizitzen
eta harritu egiten naiz oraindik
denborak eta plazerak ukitu ez dituzten
bazter berriak kausitzean
bizitza diot eta zugan pentsatzen dut
laztana
zabalagoak dira nire
eremuak zure ezpainetan
© Igor Estankona