Eskuen sustraiak
Eskuen sustraiak
2009, poesia
136 orrialde
978-84-92468-12-6
azala: Idoia Beratarbide
Oier Guillan
1975, Donostia
 
2013, poesia
 

 

AURPEGIAK

 

Aurpegi ebatzi batek bonbardatu du iragana.

        Zarratu behar dira leihoak,

        prezintatu hormak,

        usteltzeraino hustu hiztegiak;

        eztandarazi inprimategiak

        behinolako zubien moduan,

        garapenaren trenak zapal ditzan oin hotsak.

 

Aurpegiak estali ditu zarataz betetako isiltasunak.

        Eskuburdina hotzen tintarekin

        albiste bat marraztu dute

        mintzo denaren eskuan.

 

Aurpegi zedarritu batek zartatu du oraina.

        Ehortzi behar dira gutunak,

        irakatsi itsutasuna,

        lurperatu besarkadak;

        ez daitezela izan

        maitasunera lotzen zaituzten kateak.

 

Ezabatu aurpegiak seme-alaben marrazkietatik.

        Erauzi denak oroimenetik.

        Ekarri argazkietara

        kaskoen berdintasun demokratikoa.

        Baztertu kokotsa, masaila, pertsona.

        Erosi Justiziaren malkoak

        saminaren odolarekin.

 

Eta bakea ostentzean zenbatu berriz aurpegiak.

Aurpegiek ez diote, baina badira.