Suzko lilia
Suzko lilia
2008, poesia
104 orrialde
978-84-92468-02-7
azala: Xabier Gantzarain
Hedoi Etxarte
1986, Iruñea
 
2021, poesia
2012, poesia
 

 

XALALA

 

eta dutenean su artean lilia erre

izan gara amaigabe:

nola gaua den

ezpainak ireki arte

nola gorputzek egiten duten dar-dar

dantzalekuko musikarekin

 

eskuak altxatuko ditugu

gurutze-gorriak zaurituak daramatzanean

negar eginarazi nahi digutenean

                                                wir sind friedlich

                                                was seid ihr?

xalala abestuko dizuegu biluzik

ipurmasailak mugituz irribarre egiten dugun

neskatilatxoak garelako

eta gortina artean dena jango genuke

kearekin nahastuta

etorri eta doazen argiekin apainduta

harlauza hautsien gainean

oinutsik egiten dugu dantza

lizunkeria dugulako azken helmuga

 

eta dutenean su artean lilia erre

izan gara amaigabe:

nola gaua den sakon

jositako begiak zabaldu arte

nola gorputzek egiten duten dar-dar

dantzalekuko musikarekin

xalala abestuko dizuegu biluzik

 

bizitza mikatza da

eta batzuetan goxoa ere bada

berez mikatza dela

ahaztu ez dezagun

 

bizitza mikatza da eta

xalala abestuko dizuegu biluzik