POESIA

sagastia sortzeko patio mortuan

artizarrari leku egiteko leihoan

garunari taupaka irakasteko

enbatari hitz batzuk eransteko

gosetuaren igitaia zorrozteko

ez harria esnatzeko

azala behar nuke!

ordua emateko hartzen zaitut eskuan

igitaiaren gosea zorrozteko

laguntza emateko hitzetan gatibu den kantuari

upelak porrokatzeko tristuraren merkatuan

epaileei isiltasuna eskatzeko

ingudeak eskertzeko

huts eginik laztan bat asmatzeko

ez harria esnatzeko

kopeta behar nuke!

huts eginik min hartzeko

huts eginik min hartzeko

mailua zarelako

hartzen zaitut eskuan ordua emateko

maisua zarelako

hartzen nauzu eskutik neu esnatzeko

eta harriari galde egiteko

© cc-by-sa Koldo Izagirre