BATEK DAKI BIHAR NOLA

egiak esateko zaildu naute

zer axola nork zerk

edo nahiago baduzue

ikasia naiz hitz zekenak josten

kate izandako haiek

gaur dira kordelak

bihotza ez du bermatzen

beti zozkor berak

hosto izandako haiek

gaur dira orbelak

bihotzak ez ditu biltzen

beti mozkor berak

ikasia naiz koplatzen

malenkonia sortak sortzen

zer axola non nondik

frogatzen ahal dizuet elurra ez dela ikusgarria

gaizto izandako haiek

gaur dira onberak

bihotza ez du zauritzen

beti aizto berak

aintzak izandako haiek

gaur dira toberak

bihotza ez du gaiztotzen

beti gaizto berak

zaildu naute gezurrak esateko

edo nahiago baduzue

ikasia naiz hunkidurak josten

ikasia naiz koplatzen

lilisortak zimeltzen

zer axola nolakoak

frogatzen ahal dizuet bizia ez dela zekena

historia izandako haiek

gaur dira nobelak

bihotzak hastio ditu

beti arno berak

bizkor izandako haiek

gaur dira motelak

bihotza ez du berotzen

beti asmo berak

kartsu izandako haiek

gaur dira hozberak

bihotza ez du bizitzen

beti hilotz berak

egutera ziren haiek

gaur dira mospelak

bihotza ez du ibiltzen

beti bihotz berak

© cc-by-sa Koldo Izagirre