NORTEKO HARITZAREN GERIZPEKO GOGOETA

tamarizak aranondoak pikondoak

maite izan ditut beti

alegia luzatzeari utzi nionetik

(zeinen goitueza naizen esateko modua:

aita etxetxiki esaten zioten baserri batean jaioa zen

zapata koxkordunetan bizi izan zen ama

plateretara iristeko)

sagarrondoak hurritzak gurbitzak

maite izan ditut beti

zu apalen azpitik igarotzea gustatzen zait

hostoek ilea laztanez didatela lazten

(oraindik soildu ez naizela esateko modua)

ez ditut maite zu gaitzak

pakidermo azala daukate gehienek

eta empire state konplexu nabarmena

zu apalak maite izan ditut beti

(eskua goititu hutsaz

belauniko jarri behar izan gabe

iritsi nintekeela frutara oroitarazten didate)

eta orain maiteago

soildu ez naizela nautenez kontsolatzen

sekulako kezkatan bizi bainaiz:

zer gertatuko zait buru soila bihurtutakoan?

nola eginen diot hazka kokoteari?

nola kenduko dut belarrietako argizaria

hatz txikerrik gabe?

nola pentsatu behar dut

zapata puntetara behatu ezinik?

orduan, agian, buru soila naizenean

haritz ezki pago lizar urki platanondoak maiteko ditut

azpitik pasatzerakoan ilerik ez daukadala

gaztigatuko ez didaten zu harroko building horiek

han artean gaitzik ez duten

zu apaleko amodioetan laketzen naiz

© cc-by-sa Koldo Izagirre