LAMINACIONES DE LESACA

idi bizkarra lurrun lamaran

hebaindua goldaketan

ekarri ohi dit gogora beti

txatarrak portuan ketan

milia luzeko neketan

nondik datorren ez dakit baina

urrundik behar du izan

halako lamaran agertzeko

nekeko idi deritzan

txondor sutuaren gisan

zer izan ote zen inoiz batez

ketan dagoen txatarra

golde noblea aizto zitala

kalteko tresna zatarra

edertu baten zuztarra

metal sendoko fiertasuna

hona heldu da zirtzila

kaian daukate zain galdatzeko

dirudiela txirbila

labe ondoko zizpila

ketan dantzari salda pindarrak

labekarien sorbaldan

ketan galdarak galdategian

hamar meta metal baldan

burdindu beharrez galdan

galdategitik dute aterako

bizi berrirako idi

ostera dadin bihur txatarra

moila gaineko sasidi

metalgintzaren agiri

bizi gurpila lanaren latza

zeinen kantagai saskarrak

nik sortu gabe niri emanak

ketan dagoen txatarrak

nekeko idi bizkarrak

© cc-by-sa Koldo Izagirre