Bildumaren zerrendara itzuliIdazle beraren beste lanak

 


LIBURUARI BURUZKO
KRITIKAK

 

Udaberriko bezperak

(kantatzeko kantak)

 

Nenufar zuriak alkohol usaina

dariela

neure boligrafoko tintetan

igeri

udaberriaren seinale

Lumabelar ostotxo zuriskak

hegaz

neure kuadernoko horrietan

alde egiten

udaberriaren seinale

 

              I

Udaberriko bezperetan

Arratsak

Erdi lo

Geratzen dira

Horiska meheetan etzanda

Su estrainoenak pizten dira orduan

Nerabeen bihotzetan

Eta inguratsean

Erreboltara deitzen gaituen zerbait

                                          arnasten da.

 

              II

Heroea zara

Zeure buruaren aurka

                      Oldartu

Eta

Heroinaz

Zeure larrua

Hautsi duzu

Paretaren kontra jarri zaituztenei

Maiteagoa duzula

                  Pareta

Heuren fusil ahoak baino

                    Frogatzearren.

 

              III

Gure lehen kantuak

Azkenak izanen zuentzat

Gure lehen suek

Hotzikarak eraginen zuei

Heriok piztuko bait ditu

Urrezko katabutetan

Ehortziren zaituztegu

Usoez inguraturik eta

Errespetatu eginen ditugu

Zuen konputagailuen lutoak

Ez bait ditugu

Beste sekulan ere

                          Abiaraziko.

 

              IV

Prest ditut nire armak

    eskuetara datorkidan

                          edozer

            eta zuenganako

      gorroto infinitoa

 

              V

Erabaki sendoa

Munizioak amaituz gero

Prest gaude

Herkide hilen hezurkinak

Hartuta

Balak osotu eta

Tirokatzen segitzeko.

 

              VI

Aingeruei idatzi diet

«Itxi itzazue zeruko ateak

Errebolta garaia heldu bait da

Utz itzazue santu ustelok

Heurei darien kiratsean itoten»

«Jainkoak sortu zituen klaseak

Zatozte ifernuko sutetara

Historiazko odolkietaz

Txintxiburdintzia egitera»

« Jainkoa ez bait da ezer zuek barik

Zatozte erreboltara

Birjinek gozatu egin gura zaituzte

eta ezin diezaiekezue mesede hau uka»

                Badakit aingeruen erantzuna

                Ortzadarrean behera etorriko dena

                Hauetariko suzko eurite osteren batetan.

 

              VII

Gu

  asunak bezalakoak gara

                            aski da

zuek edozein bazterre—

                                  tan

          kaka edo txiza egin

                              izatea

        gutarikoak hazte—

                                  ko

                              Zuek

        desagertutakoan ere

                                  gu

              bersortu eginen

                                gara

      zeuen hondakinetan.

 

              VIII

Urrunegi heldu da zuen gorrotoa

Unibertso osoaren bira eginda

Gerripean

Akuilatzen gaituen

Iltze muturra bihurtuta

              Zeuen aurka

                        Garamatza.

 

              IX

Gauren batetan

Kale ttukunketa zerbitzuetako

Argi birakorren pean

          Joko dugu larrua

Zihur jakinen dugulako

          Biharamunean

Zabortegiak heurak ere

Geureak izanen direna

Eta ez dugu

Inorako presarik izanen.

 

 

© Omar Nabarro

 


www.susa-literatura.eus