LEHEN TAUPADAK

uste dut euria ni etxetik atera zain dagoela

hodei beltzetan gordea

kanileko ur hotza edaten dut

itsasoan egarriz ito direnen gorazarre apalean

jaso dugun guztiarengatik esker zorrez

miresten dut egunsenti hau

eta ez eman behar zaigunaren promesa gisa:

dirua zoriontsua da

hego haizea txistu joka ari da

elizan gauez kutxa gotortuan gordetzen da

jainkoaren irudia

eta sasiak hartuko du noizbait ozeanoa

dena ez da denbora eta espazioa ordea

bada beste nonbait errenditzen den gauzen sentimendua

aroen aldamenetik ibilian doana

eta han agian bestek ordainduko dute

gure abandonuaren bahia...

euri tantak atezuan daude etxe inguruan

teilatu hegaletatik nire gainera jauzi egiteko

ez dut inoiz ulertuko perfekzioa:

hitz hanpatuak jaulkitzen ditut

eta ez dakit noiz isildu...

gaur bankuak itxita daude

eta oraindik maite nauzula uste dut

© cc-by-sa Jose Luis Otamendi