MAIATZ BERRITAN

esan didate suge gorriak umetzeko

sasoi betea dela hau

ibai bazterrera jotzen dutela

oskola urratuta kumeak jaio eta

berriro mendira aldatzeko ondoren

piztia jendearen ibilera irudikatzen dut

ortzia mehatxuz enpo bidea zail...

ikusi dut hitzak mamitu egiten direla sarri

esaten eta idazten direnean

ez dela berdin zer non eta nola esan

arraso muda daitekeela esanaren indarra

mintzoaren hautua egiten denean...

mende erdia daramat

zer naizen galdetzen neure buruari

bart aspaldiko lagun batek

sega mekanikoaz hatz batean irekia egin

eta herri hau ongarritu zuen bere odolarekin

bart bi suge txiki kalitu nituen

zabortegian gorpu agertu zen

gizon gazteaz akordatzeke

bart ohiko bihurgune itsuan eman zuen

beste bira bat munduak

eta nik lasai so egin nien

egin gabe bazter lagatako ekimenei

hurrengo egunsentiaren saria

beste ezeren nekerik gabe

seguru irabazia banu bezala:

ez den hizkuntza batean mintzo

ez den herri batean lo egin

ez den maitasun baten ondoan jaiki

eta kapitalaren logikak

erraz narama

narabil

© cc-by-sa Jose Luis Otamendi