Gaur ihauli behar zaitut,
sofriarazi berba mingarriz bete
sabeletik eztarriraino,
berariaz eta zure erru bakarra
neu naizela
hainbat eman didazunez gero:
mende bi eta zenbait liburu
eta artilezko galtzerdiak
hamaika zapuzteren truk.
Negu hotza gero aurtengo negu hotza,
dagokion testuinguruan segurki,
eta maite zaitut maite
testuinguruz kanpo ordea.
Zenbat ordu eman ote dudan
zure arimarekin errimatzeko
berba goxoen bila, eta behin
zure izenaren letrak permutatu nituen.
Ez zergatik galdetu,
arren itaunik ez,
berehala damu duket
alabaina (eman diezaiogun txanda
ezintasunaren ahotsari)
utzi gaurko gutunean
gogorki trata zaitzadan.
© Xabier Izaga