Manuel Perez Pezuñak
ez zuen orbain bat bera ere falta
iragan astean iritsi zenean.
Espetxe ospitale psikiatrikoan ikasia du
psikopata ona izatez gerotan egunero
hogeita bi pilula irentsi behar dituela.
Begikoa da oso eta pozik egoten da,
areago kontuak egindakoan
hamazazpi egun barru kalean dela deduzitu duenetik.
Gaur, aldiz, artega dabil
atzean laga dituen urratsak ostu dizkiotelako.
Guganaino hurbildu delarik
tabakoa erosteko diru apur bat eskatu digu,
"una librina" bere ahots kraskatuan,
eta psikopata dela dio behin eta berriz,
harro, eta kalera behar duela hiru hilabete barru,
eta haren lepoko zain gero eta hantuagoek
lehertu behar duten momentu berean
alde egin digu patioan barrena,
harro, bere psikopatia paseatzen.
© Xabier Izaga