Bildumaren zerrendara itzuli

LIBURUARI BURUZKO
KRITIKAK

 

LEHENENGO SAIOA

 

Neure ahotsa

hormetan errebotatzen

entzuteak izorratzen nau,

 

egunero hitz berberez

madarikatzeak nardatzen nau,

 

nire sudurraren proiekzioak

ezkerreko orkatilaren kontra

topo egiteak aspertzen nau.

 

Eta paseatu egiten naiz

itxuraz

indiferente,

zelda honetan bizi den armiarma bezala

(batzuetan barre egiten die nire belarriei

atzazalak margotzen dituen bitartean),

deusezezko txori bat bezala

Ederra litzateke

hamalau litro

        aire

                edatea,

patrikak

        hodeiz

                betetzea,

neure burua

        mendiz

                estaltzea,

ur-jauzi batean barrena

        korritzea

                bisera horidun

                zaldi baten antzera.

 

Tira...

ez naiz bederen

begirada ilunak bizikai dituzten

harresi-ereileen bazka izanen,

 

ez ditut bederen

bekainak salduko

sekula euri usainik ez dagoeneko

despatxoetako legeei

hautsa kentzeko.

 

 

 

© Xabier Izaga

 


www.susa-literatura.eus