Bildumaren zerrendara itzuli


LIBURUARI BURUZKO
KRITIKAK

 

Arratsalde osoan ez da sumatu

                        ohiko burrunba etengabea,

bosgarren zeldako gaixoaren kantu,

                        garrasi, danba izorranteak;

 

goganbeharra eta tristura nagusi

                        arratseko tenore goibelean,

eta zeinen jasangaitza zarata

                        gogaikarri haiek ez entzutea!

 

Bat-batean munduan bakar naukan

                        isiltasuna hausten

mila oinots bortitz, mila ahots urduri

                        korridorean zehar,

 

eta ate azpitik sartzen

                        ke ikusezin hori,

bizi iraungi berri baten kea, isilka

                        iritsi den herioren kiratsa.

Galeriako bizilaguna,

                        lagun bizia zena,

ohean zerraldo idoro dute

                        inoiz baino geldiago.

 

Bizkitartean gauak bere ilegurizko

                        mantu iluna hedatu du

eta niri gogora datorkit atzo

                        bonbila berri bat ukatu zidan

                        mixerablea.

 

 

 

© Xabier Izaga

 


www.susa-literatura.eus