Iturri fidagarrien bila idoro duzu
ur uherrak ere egarria berdintzen duela.
Iturrian, baina, ur uherrik ez.
Ausart zaitez, behin bederen,
ez ereinotz usainean baina sasi artean.
Ekarzu argi pittin bat ilunbeko
xirripa honetara eta ikusi bertatik bertara
ezintasuna metatzen ekaitz osteko
ekaizpean. Erdu besterik ez bada ere
jarauntsidun aukera-berdintasuna eta
lukurreri eskubidea aldarrikatzera,
erdu herrenaren makuludun pribilejioa
salatzera. Erdu eta sala ezazu
ezin konta ahala eguneko bakardadearen
lekuko den
sei metro koadroko pribilejio hau.
© Xabier Izaga