Balearen zurrunga besterik ez zekarren itsasoa
Eta elefante ebasten utzizaleen letaginez egindako
Bolizko dorre berriak ez dituk
Poesiaren erresuma Letaginik gabeko orro Eguzkipeko itsaso
Baina erorian zeudek ordea balizko erroten paretak
Erasorik probokatzen ez duten ele zurien kabi
Mugak ezarri dizkiate eta debekaturik zeudek
Arma debekatuak Gerla hau heriotzerainokoa omen da
Baina inor hil gabe
Zaldiak izerdi hotza
Arin dakar heriotza
Ez du zubirik behar izaten
Joteko nire bihotza
Hator jaso itzak hitzez hitz balizko errotak
Ez duk burua zertan zuritu behar
Zabal ezak heure hegoen guardasola beltza
Egin dezagun orro elausoak diezagun oihartzun
Ur berriak datozen herrizko errotarri honetara
Debekatuak dauzkagu arma guztiak baina
Hitzak ez du hitzetan loratu behar
© Koldo Izagirre